Seranan-tsambon'i Ehoala

Ehoala dia seranan-tsambo malagasy ao amin'ny Kaominin'i Tôlagnaro ao amin'ny Faritra Anosy izay 10 km ao atsimo andrefan'ny tanan'i Tôlagnaro (na Fort-Dauphin). Any ivelan'ny tanàna manakaiky ny seranam-piaramanidin'i Tôlagnaro no nanorenana azy ary nanomboka ny fampiasana azy tamin'ny 8 Jolay 2009. Ny orinasa Rio Tinto no namatsy vola be indrindra tamin'ny fanamboarana azy[1] satria nila seranan-tsambo an-drano lalina ity Rio Tinto ity mba hanondranany ny ilmenita izay trandrahan'ny QIT Madagascar Minerals (QMM) eo akaikin'io seranana io (fitrandrahana ilmenita ao Mandena). Ny Rio Tinto no tompon'ny 80 %n'ny vokatra azo raha 20 % ny an'ny firenena malagasy.

Tsy miankina amin'ny fanjakana malagasy ny fitantanana io seranan-tsambo io fa sahanin'ny Port d'Ehoala SA, izay rantsan'ny Rio Tinto. Ampiasaina amin'ny fifamoivoizana an-danomasina eto Madagasikara sy iraisam-pirenena io seranan-tsambo io sady misy ny fadintseranana. Heverina hanala ny fitokana-monin'ny faritra atsimon'i Madagasikara izay sarotra itsofohana amin'ny lalana an-tanety ny fisian'io seranan-tsambo io. Nanomboka tamin'ny volana Jolay 2009 hatramin'ny volana Jolay 2015 dia nisy sambo 646 izay nitody teo ka mpitondra entana anaty kontenera ny 192 tamin'izany, mpitondra harena an-kibon'ny tany ny 73 ary sambo lehibe mpitondra mpizaha tany ny 37.