Saô Tôme e Prinsipe

I Saô Tôme e Prinsipe na Repoblika Demôkratikan' i Saô Tôme e Prinsipe dia firenena ao Afrika Afovoany, ao amin' ny helodranon' i Ginea, ao amin' ny Ranomasimbe Atlantika. Ny renivohiny dia i São Tomé. Ny tanàna lehibe indrindra dia io renivohiny io ihany. Mirefy 1 001 km². Niisa 183 176 ny mponina tao araka ny fanisana natao tamin' ny taona 2011. Ny faritr' ora dia +0. Atao hoe Santômeana ny vahoaka ao.

Sainan'i Sao Tomé sy Príncipe

Saritanin'i Sao Tomé sy Príncipe

Atao hoe São Tomé e Príncipe na República Democrática de São Tomé e Príncipe izy amin' ny teny pôrtogey.

Tangoro-nosy ahitana nosy roa lehibe (dia i São Tomé sy Príncipe) sy nosy madinika maro koa no mamorona ny tanin' ity firenena ity. Be tendrombohitra ireo nosy ireo izay nifirona amin' ny alalan' ny fipoahan' afotroa, sady rakotra alan-jana-pehin-tany ny 30 %n' ny taniny. Manana toetanin-jana-pehin-tany ity firenena ity.

Miakina be amin' ny fambolena sy ny fiompiana ny toekaren' i  Saô Tôme e Prinsipe, indrindra fa amin' ny fambolena kakaô.

Ny kristianisma katôlika no fivavahan' ny ankamaroan' ny mponina ao amin' ity firenena ity. Ny 30 %n' ny Santômeana dia monina any ivelan' ny fireneny, indrindra any Pôrtogaly sy any Angôla ary any Gabôna.

Sarin-tanin' i Saô Tôme e Prinsipe

Zanatany pôrtogey taloha i Saô Tôme e Prinsipe izay nahazo ny fahaleovan-tenany tamin' ny taona 1975. Ny fiteny pôrtogey no fiteny ôfisialy any.