Sahely

I Sahely dia ilay faritra miendri-pehinkibo eo anelanelan'ny faritr'i Sahara ao avaratra, sy ny faritra feno bozaka nefa vitsy ala manandrify an'i Sodàna izay toerana manorana ihany ao atsimo. Mitomandavana hatrany amin'ny morontsiraka any Atlantika ka hatrany amin'ny Ranomasina Mena izy. Avy amin'ny teny arabo hoe سَهْل sah'l izay midika hoe "tany lemaka" ny teny hoe Sahely, izay soratana amin'ny fiteny eoropeana maro hoe Sahel. Miovaova arakaraka ny mpanoratra ny faritra tondroina amin'ny hoe Sahely. Amin'ny mpanoratra sasany dia mahafaoka ireo faritra manamorona an'i Sahara izy: misy noho izany ny atao hoe Sahely Atsimo sy ny hoe Sahely Avaratra. Ity farany ity no tiana hotenenina rehefa tsy tovonana ny mpamari-toetra hoe atsimo ilay anarana.

I Sahely Avaratra

Ireto avy ny firenena voakasik'i Sahely: i Alzeria (tapany farany atsimo), i Senegaly, i Maoritania (tapany atsimo), i Malý, i Borkina Fasô, i Nizera, i Nizeria (amin'ny tendrony avaratra), i Tsady (ao afovoany), i Sodàna (ao afovoany, indrindra fa ao Darfora sy ao Kôrdôfàna) ary i Cabo Verde (frantsay: Cap-Vert). Atambatra amin'ireo indraindray i Jibotỳ, i Etiôpia, i Eritrea ary i Somalia.