Paoma (maniry)
Ny paoma dia zavamaniry fihinam-boa, maitso ravina lalandava, maniry any amin’ ny faritra manana toetany antonony mangatsiaka. Malus no anarany ara-tsiansa.
Misy karazany maro ny paoma ka ny sasany hazo lehibe fa ny sasany kosa hazo madinika. Ny tena be mpamboly, satria fihinana dia ilay atao amin' ny anarana ara-tsiansa hoe Malus domestica. Na dia misy voniny sy voany aza ny karazana paoma sasany dia volena mba hohaingon-tanàna.
Toetoetran' ny paoma
Ravim-paoma
Miendrika boribory lavalava ny ravim-paoma, fisaka ny eny amin’ ny tendrony ary be tsiratsiraka ny ao ambaniny, indraindray misy tsilo. Hazo moramihintsan-dravina ny paoma.
Vonim-paoma
Boribory miloko fotsy madio na misy soritsoritra mavokely na mavokely somary matroka ny voniny. Misy ny karazam-paoma manome voniny miiloko mena.
Voam-paoma
Ny voan' ny paoma dia be nofony malemy, mamy na somary makirana, sady misy ranony. Isan-karazany ny fomba ihinanana ny paoma: hanina rehefa masaka tsy nahandroina na masaka nahandroina, hanina lena na maina, hanina ventiny na atao ranom-boankazo. Azo anamboarana vinaingitra sy alikôla koa ny paoma.
Fambolena paoma
Tantaran' ny fambolena paoma
Novolen’ ny olombelona hatry ny anarivotaona ny paoma mba hahazona ny voany izay manana tsiro mamy sy somary makirana. Antriny dia maro ny karazana paoma avy amin’ ny fanaovana girefy taloha na avy tamin’ ny fampifangaroana lahimbony sy mbony avy amin’ ny paoma maro samy hafa. Tokony naniry tany amin’ ny faritra manodidina ny Ranomasina Mainty hatrany amin’ ny Ranomasina Kaspiana ny paoma, nefa tsy fantatra mazava ny toerana naniriany voalohany ao amin’ io faritra io. Efa tia paoma ny Grika sy ny Rômana tamin’ny Andro Taloha. Ireo mpijirika eorôpeana voalohany tonga tany Amerika Avaratra no nampiditra ny paoma tao amin’ io kôntinenta io.
Toerana mety amin' ny fambolena paoma
Ny toerana mety tsara fambolena paoma dia ireo faritra manana sala-mari-pana manakaiky ny 0 °C mandritra ny roa volana. Misy anefa ny paoma mahatanty hatsiaka hatrany amin’ ny -40 °C. Ny paoma dia miely amin’ ny alalan’ ny girefy na ny fanatsatohana ny tahony amin’ ny tany. Ny lahimbony sy ny vavimbony avy amin’ ny vonim-paoma iray dia tsy mety mahavanona voany fa tsy maintsy mila lahim-bony avy amin’ ny vonim-paoma hafa karazana. Noho izany dia volena mifangaro ny karazam-paoma.