Masedônia Avaratra

I Masedônia Avaratra na Makedônia Avaratra dia firenena ao Eorôpa Atsimo, ao amin’ ny Saikanosy Balkanika. Ny renivohiny dia i Skopje. Ny tanàna lehibe indrindra dia ny renivohiny. Mirefy 25 713 km² ny velaran-taniny ary miisa 1 832 696 ny mponina tao aminy araka ny fanisana natao tamin' ny 2021. Ny faritr' ora dia +1. Atao hoe "Repoblika Iogôslavan' i Makedônia Taloha" koa izy.

Sainan'i Masedonia

Saritanin' i Masedônia

Tendrombohitra sy lohasaha lalina ary havoana no mandrafitra ny vohon-tanin’ i Makedônia Avaratra. Tsy manana morontsiraka ity firenena ity. Ny ony Vardar izay mamakivaky azy avy any avaratra-andrefan mankany atsimo-atsinanana no hany lalana ahafahany mifandray amin’ i Grisia. Ao amin’ ny faritra misy horohoron-tany matetika no misy an’ i Makedônia Avaratra.

Makedôniana na Masedôniana ny 65 %n’ ny mponina any Makedônia Avaratra, ka ny maro amin’ izy ireo dia Kristiana ôrtôdôksa. Misy Albaney koa, izay manaraka ny fivavahana silamo, ny any. Maro ireo vahoaka vitsy anisa monina ao Makdônia Avafratra ka anisan’ izany ny Torka, ny Rôma ary ny Serba na Serbiana. Ahitana disadisa eo amin’ ireo vahoaka isan-karazany ireo (indrindra eo amin’ ny Albaney sy ny Makedôniana) ao Makedônia Avaratra, sahala amin’ izay hita ao amin’ ireo firenena ao amin’ ny faritry ny Balkana.

Manana tany midadasina azo volena i Makedônia Avaratra, ary isan-karazany ny zavatra volena any: ny hazo fihinam-boa, ny landihazo, ny legioma, ny paraky, ny voaloboka, ny voamadinika sns. Betsaka koa ny harena an-kibon' ny tany any, indrindra ny akoram-piramainty sy ny arintany ary ny vy.

Tao amin' i Iogôslavia taloha i Makedônia Avaratra izay nahazo ny fahaleovan-tenany tamin’ ny taona 1991. Tamin’ ny taona 1993 vao nankatoavin’ ny fianakaviambe iraisam-pirenena izany fahaleovan-tena izany.