Lakandranon' ny Pangalana
Ny Lakandranon' ny Pangalana dia lakandrano eto Madagasikara namboarina tamin' ny taonjato faha-20. Mirefy 700 km eo ho eo ny halavany, mampitohy an' i Farafangana amin' i Toamasina.
Fanamboarana ny Lakandranon' i Pangalana
Ny fiandohan' ny fanamboarana ny lakandrano
Ny ilany atsinanan' i Madagasikara dia tondrahan' ny ony sy renirano maro. Midina avy eny an-tendrombohitra ireo renirano sy ony ireo dia mamorona farihy sy dobo tsy tambo isaina. Nanakana ny fanamboarana lalana ireo lalan-drano ireo. Mampidi-doza ny morontsiraka ka sarotra ny fifamoivoizana.
Ny asa nandritra ny fanjanahantany
Nandritra ny fanjanahantany, ny jeneraly frantsay Joseph Gallieni dia nanangana tetikasa fanamboarana lakandrano manamorona ny morontsiraka atsinanana mba hampiharana tsara kokoa ny fanaraha-maso ara-pitantanana sy ara-miaramila ny faritra. Nanomboka tamin' ny taona 1896 ny asa fanamboarana lalan-drano mirefy 665 km eo anelanelan' ny farihy sy farihy madinika ary renirano, manomboka any Foulpointe (na Mahavelona) ka hatrany Farafangana. Mba hanaovana izany dia niantehitra tamin' ny asa an-tery vozona nata amin' ny teratany i Gallieni, izay nanery ny mponina tao an-toerana hiasa. Olona telonjato no nangady tsy an-kijanona ny lakandrano tao anatin' ny toe-javatra mahatsiravina. Notokanana tamin' ny taona 1904 ny ampahany voalohany teo anelanelan' i Brickaville sy Toamasina, ary niitatra hatrany Vatomandry izany tamin' ny taona 1915, alohan' ny hamitana azy any Farafangana tamin' ny 1949.
Ny fanamboarana azy dia nahafahana namaha ny olana amin' ny fifamoizana matetika tojo ny mpivarotra sy ny tafika an-dranomasina any amin' ny morontsiraka atsinanan' ny Nosy: tena nampidi-doza tokoa ny fitaterana entana amin' ny toerana mifanakaiky tany noho ny fisian' ny haran-driaka sy ny onja mahery ary ny onjan-dranomasina nateraky ny fihaonan' ny Ranomasimbe Indianina sy ny Kôntinanta Afrikanina. Amin' ity toerana ity dia betsaka ny sisam-paharavan-tsambo sy ny antsantsa ka mampidi-doza ny milomano manamorona ny morontsiraka atsimo-atsinanana, antsoina hoe "morontsiraky ny rivodoza".
Tamin' ny alalan' ireo heniheny miolakolaka no nanomezan' ilay lakandrano lalana ahazoana mitatitra haingana ny entam-barotra, izay niteraka fanorenana vohitra maro teo amorony. Taorian' ny fanjanahantany dia tsy nitohy ny fikojakojana azy ary nirodana tsy tapaka ny lakandrano izay nohadiana tamin' ny fasika. Vetivety dia nanirian' ny voahirana lehibe sy ny tsikafonkafombazaha ny lakandrano, ka nanarona ny ampahany ary nanasarotra ny fandrosoan' ny sambo. Hadino nandritra ny 20 taona izy io, ka nilaozana ny tetezana sy ny lalamby teo aminy.
Ny lakandrano ankehitriny
.jpg.webp)
Nanomboka tamin' ny taona 1960 sy ny fiafaran' ny fanjanahantany dia niezaka nitahiry ny ampahany tamin' ireo zavatra namboarin' ny mpanjanaka frantsay i Madagasikara, dia ireo mpanjanaka izay efa 60 taona teto an-toerana sy nanao lalana, tanàna, tetezana, ary iray amin' ireo asa tsara indrindra ny Lakandranon' ny Pangalana.
Tamin' ny faran' ny taona 1980, ity asa ity dia nahazo vahana be. Nanao asa ny fitondram-panjakana malagasy amin' ny fampandehanana indray ny lakandrano, manomboka amin' ny fiantsonana an-dranomamy ao Toamasina ka hatrany Mananjary, 420 km bebe kokoa any atsimo. Raha tsy afaka mampiasa an' io ny sambo ankehitriny noho ny fiovavan' ny halaliny (noho ny fihaonan' ireo ony feno fasika izay mampiakatra ny fanambaniny amin' ny toerana sasany alohan' ny hivarin' izy ireo any an-dranomasina), dia mahasoa ny lakana sy ny sambo kely hafa mitondra ny entam-barotra (harona voatenona, vokatra avy amin' ny zaridaina, fary, kafe, jirofo, dipoavatra) eo anelanelan' ny tanàna, indraindray amin' ny sambo kely tsotra toy ny lakana tsy misy fanary, vatan-kazo nolavahana ary atosiky ny fivoy, na zahatra volotsangana, atosika amin' ny tehina lava.
Raha ny tapany avaratra amin' ny lakandrano no tena izoran' ny lakana mitondra mpandeha sy entam-barotra mankany amin' ny seranan-tsambon' i Toamasina, dia tsy dia be loatra ny amin' ny tapany atsimo. Izy io dia ahitana lakandrano kely mifandimby mampitohy farihy maro misy zava-maniry be dia be (Ampitabe, Akanin' ny Nofy) izay anirian' ny zavamaniry filamatr' i Madagasikara, dia ny ravinala. Eny amoron' ny lakandrano dia misy tanàna maro mitokantokana, ahitana trano bongo nentim-paharazana. Ny ankamaroan' ny mponina ao dia velona noho ny lakandrano, amin' ny fivarotana trondro sy amin' ny asa tanana amin' ireo sambo mandalo. Ny mpitondra sambo no mampifandray ireo vondrom-piarahamonina samihafa ireo sy ny tanàn-dehibe, miantoka ny fanaterana entana sy vatsy ho an' ny mponina, manatanteraka ny hafatra natao am-bava tamin' ny fandalovany teo aloha, indraindray herinandro maromaro mialoha.
Tetikasa ho fanatsarana sy fiarovana ny Lakandranon' ny Pangalana no foto-kevitry ny fifanaraham-piaraha-miasan' i Marôka sy i Madagasikara izay iarahan' ny masoivoho marôkana Marchica MED SA sy ny Governemanta eto Madagasikara tamin' ny 21 Novambra 2016 nefa mbola tsy nanomboka ny asa.
Tamin' ny volana Septambra 2019 anefa dia efa nisy ny fandavahana ny lakandrano tamin' ny alalan' ny masoivohon' ny Agence Portuaire Maritime et Fluviale.