Kristianisma any Torkia
Ny kristianisma any Torkia dia manana tantara lava izay nanomboka tamin' ny taonjato voalohany. Amin' izao andro vaovao izao, ny hamaroan' ny Kristiana any Torkia dia nihena avy amin' ny 20 % hatramin' ny 25 % mankamin' ny 3 % hatramin' ny 5,5 % ankehitriny, ka mifandraika amin' ny isa 200 000 hatramin' ny 320 000 izany.
Sarotra ny mamantatra ny tena isan' ny Kristiana any Torkia, noho ny antony maro, indrindra satria tsy misy fanisana ôfisialy momba izany ny any Torkia izay firenena laîka. Mahasarotra ny fanisana koa fisian' ireo Miozolmana lasa Kristiana nefa manafina ny finoany noho ny tahotra ny fanavakavahana na ny fanerena ataon' ny fianakaviana. Ny antony hafa dia satria ny fanisana azo jerena dia tsy azo antoka: ny ankamaroan' ny vahiny avy amin' ny firenena ivelany dia tsy voaisa, indrindra ireo mpitsoa-ponenana; maro ireo vondrona kristiana izay miparitaka manerana an' io firenena io, izay misafidy ny hiaina tsy misy mpahalala mba tsy ho azon' ny fitsipika momba ny maha laîka an' i Torkia. Ohatra amin' izany, na ny fiangonana lehibe sahala amin' ny an' ny Armeniana aza tsy afaka manisa ny mpino ao aminy izay miparitaka manerana ny tanin' i Torkia. Tombantombana sisa no azo atao.
Ny isan' ny Kristiana any Torkia dia tsy mihoatra ny 400 000, na dia ao Istambul izay tanàna lehibe indrindra any aza, izay toerana misy ny patriarkata roa tranainy sady manana ny maha izy azy, dia ny patriarkatan' ny Grika sy ny patriarkatan' ny Armeniana. Ny Armeniana no maro anisa indrindra (60 000 any ho any ka ny 45 000 ao Istambul fa ny sisa dia monina indrindra any Antakya sy any Kayseri), izay mizara amin' ny fiangonana telo: Apôstôlika (57 000), katôlika (3 000) ary prôtestanta (500). Misy koa ny Siriaka (20 000 ôrtôdôksa miparitaka any amin' ny faritra atsimo sy 2 000 katôlika any Istambul sy any Mardin), ny Katôlika latina (5 000 izay hita indrindra ao Istambul sy Izmir miaraka amin' ny fiangonana madinika any Bursa, Konya, Mersin, Tarsus, Antakya, Iskenderun, Samsun, ary Trabzon), ny Ôrtôdôksa grika (3 000 any Istambul, Gökçeada, Bozcaada ary Antakya), ny Ôrtôdôksa rosiana izay tombanana ho 15 000 any ho any, ireo prôtestanta "vaovao" ara-pilazantsara, izay tombanana ho 5 000. Tamin' ny taona 2017 dia nahatsapa ho sahirana ny Krisriana any Torkia noho ny fanavakavahana.