Hamita (vahoaka)

Ny Hamita na Hamitika na Kamita na Kamitika (avy amin' ny anaran' i Hama na Kama ao amin' ny Baiboly) dia zana-bondrom-pokon' ny foko kaokaziana (na Eorôpôida), izay mamondrona (mba hifameno amin' ny vahoaka semita) ny mponina avy ao Afrika Avaratra, ao amin' ny Tandrok' i Afrika, ao Arabia Saodita, ary tao Ejipta tamin' ny Andro Taloha, araka ny fandalinam-piteny sy ny etnôlôjia taloha. Nolazaina fa miteny amin' ny fiteny hamitô-semitika, ankoatry ny fiteny semitika izy ireo.

Ny "rijan-kevitra hamitika" dia mametraka fa ny firazanana (volonkoditra) hamita dia ambony noho ny vahoaka mainty hoditra ao Afrika atsimon' i Saharà. Izany rijan-kevitra izany dia nanambara, araka ny soratr' i Charles Gabriel Seligman, fa ny fandrosoana lehibe teo amin' ny tantaran' i Afrika dia vokatry ny asan' ireo Hamita izay nifidra monina tao Afrika Afovoany, amin' ny maha mpiandry ondry azy ireo, ka nitondra niaraka taminy ny hairahany ny sivilizasiony. Noheverina fa mitombina sady mifamatotra ny môdely ara-drindran-kevitra momba ny fiteny hamitika sy ny foko hamitika, hatramin' ny fiantombohan' ny taonjato faha-20. Nanomboka tamin' ny tapany faharoan' ny taonjato faha-20 no nanoheran' ny mpikaroka maro ny petrakevitra hamitika.