Fiteny ôksitana

Ny fiteny ôksitana (amin'ny teny frantsay: occitan, langue d'oc; amin'ny fiteny ôksitana: occitan, lenga d’òc na óucitan, lengo d’o) dia fiteny ao amin'ny vondron'ny fiteny rômana tenenina ao atsimon'i Frantsa, ao amin'ny lohasaha ôksitana ary ny Guardia Piemontese (any Italia), any amin'ny Val d'Aran (any Espaina) ary any Mônakô. Ôksitania no fiantsoana ny tontolo ara-piteny ary ara-kolontsaina ôksitana.

Ny rokin'ny fiteny ôksitana ao Frantsa.

Miovaova araka ny faritra isiana ny endriky ny fiteny ôksitana (roky enina, fenitra literera ary fenitra ara-tsoratra maro dia maro ary tsi-fisiana fiteny tenenina ho fenitra). Ankehitriny, araka ny ambaran'ireo loharano maro dia maro, ny isan'ireo olona miteny ôksitana dia 500 000 hatramin'ny 12 tapitrisa (raha isaina ireo olona mahazo fiteny ôksitana fa tsy mahay miteny azy). Ny havitsian'ny olona miteny ôksitana ankehitriny dia vokatry ny politika nentin'i Frantsa momba ny fitenim-paritra (patois) tamin'ny faran'ny taonjato faha-19 hatramin'izao fotoana izao. Ankehitriny, voasolon'ny fiteny frantsay ny fiteny ôksitana tany Frantsa sy ny fiteny italianina tany Italia.