Fitenim-paritra malagasy
Ny fitenim-paritra malagasy dia endriky ny fiteny malagasy tenenina isaky ny faritra eto Madagasikara izay mitondra ny anaran' ny foko na vondrom-poko miteny azy indrindra.
Fanasokajiana ny fitenim-paritra malagasy
Misokajy roa izy ireo ka ao ireo fitenim-paritra tatsinanana (izay ahitana ny fiteny merina) sy ireo fitenim-paritra tandrefana (izay ahitana ny fiteny sakalava); fanampin' ireo dia misy ireo fitenim-paritra lazaina hoe "mandray roa". Ireo fiteny any andrefana sy atsimon' ny Nosy dia fitenim-paritra tandrefana fa ireo ao amin' ny tany avo afovoany (lembalemba afovoany) sy ny ankamaroan' ny fiteny any avaratra dia fitenim-paritra tatsinanana. Ny Ethnologue dia mirakitra karazam-pitenim-paritra malagasy miisa 12 izay heveriny ho fiteny miavaka.
Fitenim-paritra tatsinanana
Ny fitenim-paritra tatsinanana dia:
- ny fiteny betsimisaraka avaratra (1 270.000 mpiteny) – tenenin' ny Betsimisaraka amin' ny morontsiraka avaratra-atsinanan' ny Nosy;
- ny fiteny betsimisaraka atsimo (2.000.000 mpiteny) – tenenin' ny Betsimisaraka amin' ny tapany avaratry ny Faritra Vatovavy-Fitovinany;
- ny fiteny amin' ny tany avo afovoany (10.893.000 ny mpiteny) – tenenina ao afovoan' ny Nosy sady ahitana ny fitenim-paritra atsimo-atsinanana toa ny fiteny antemoro sy ny fiteny antefasy;
- ny fiteny antanosy (639.000 mpiteny) – tenenin' ny vahoaka antanosy any atsimon' ny Nosy;
- ny fiteny antesaka (1.130.000 ny mpiteny) – tenenin' ny vahoaka antesaka any atsimo-atsinanan' ny Nosy.
Fitenim-paritra tandrefana
Ny fitenim-paritra tandrefana dia:
- ny fiteny antankarana (156.000 mpiteny) – tenenin' ny Antankarana any amin' ny tendrony avaratry ny Nosy;
- ny fiteny bara (724.000 mpiteny) – tenenin' ny vahoaka bara any atsimon' ny Nosy;
- ny fiteny masikoro (550.000 mpiteny) – tenenin' ny Masikoro any atsimo-andrefan' ny Nosy;
- ny fiteny sakalava (1.210.000 ny mpiteny) – fitenin' ny Sakalava any amin' ny morontsiraka andrefan' ny Nosy;
- ny fiteny tandroy-mahafaly (1 300 000 mpiteny) – tenenin' ny Antandroy sy ny Mahafaly any amin' ny tendrony atsimon' ny Nosy;
- ny fiteny tsimihety (1 615 000 mpiteny) – tenenin' ny vahoaka tsimihety.
Fanampin' izany, ny ny fiteny kibosy (41.700 mpiteny) dia tenenina any amin' ny Mayotte any amin' ny tambanosin' i Kômôro, any avaratra-andrefan' i Madagasikara.