Filaza isa (fitsipiteny)

Ny filaza isa dia marika amin' ny teny izay milaza na tokana na maro sns ny zavatra tondroina amin' io teny io na amin' ny teny mifandray aminy. Arakaraka ny fiteny no mety hahitana filaza isa amin' ny sokajin-teny iray ka ny fahita matetika ao amin' ireo fiteny eorôpeana dia ny anarana, ny mpamaritra, ny mpisolo tena ary ny matoanteny tanisaina amin' ny filaza sasany. Ao amin' ny teny misy filaza isa dia miova endrika ilay marika, ka ao ny endrika milaza tokana sy ny endrika milaza maro. Amin' ny fiteny sasany dia misy koa ny endrika milaza telo na milaza efatra aza. Ao amin' ny fiteny malagasy dia sokajin-teny vitsy no ahitana filaza isa ka isan' izany ny mpisolo tena (ohatra: izaho vs isika/izahay) sy ny mpisolo tompon-javatra (ohatra: anao vs anareo) ary ny mpisolo manondro (ohatra: io vs ireo). Ao amin' ny fiteny frantsay dia isan' ireo sokajin-teny ahitana ny mariky ny filaza isa ny anarana (ohatra: cheval vs chevaux), ny mpamari-toetra (ohatra: matinal vs matinaux), ny mpisolo tena (ohatra: je vs nous) ary ny matoanteny (ohatra: il va vs ils vont).