Empira Ôtômàna

Ny Fanjakana Ôtômàna na Empira Ôtômàna dia fanjakana na empira natsangan' ny fianakavia-mpanjakan' ny Torka ogozy, izay naharitra hatramin' ny fotoana aloha kelin'ny fipoahan' ny Ady Lehibe Voalohany. Teo anelanelan' ny taonjato faha-14 sy ny taona 1923 no nisian' izany fanjakana izany. Noravàn' ny Ôtômàna ny Fanjakana Seljokidan' i Anatôlia sy ny Empira Bizantina mba hananganany ny Empira osmanly (na ôtômàna). Lasa empira ny soltanata ôtomana taorian' ny fanafihan' ny Ôtomàna an' i Kônstantinôpôlisy tamin' ny 1453.

Fara-fiitaran'ny Empira otomàna tamin'ny taonjato faha-16 sy faha-17.

Nanambatra ny herin' ny kalifata arabo sy ny tanjaky ny Bizantina io fanjakana io, ka lasa nampitohy kôntinenta telo rehefa tafapaka tamin' ny fara tampon' ny tanjany. Niitatra hatrany Eorôpa hatrany amin' ny sisin-tany manelanelana an' i Aotrisy amin' i Hongria sy any Azia hatrany Persia, ka hatrany amin' ny morontsiraka andrefana sy atsinanan' ny Ranomasina Mena ary any amin' ny morontsiraky ny Ranomasina Mediteranea ao avaratr' i Afrika.

Amin' ny teny tiorka ôtômana dia atao hoe Devlet-i Aliyye-i Osmâniyye ny Empira Ôtômàna; fa amin' ny teny tiorka ankehitriny kosa dia Osmanlı İmparatorluğu.

Fantatra ihany koa amin' ny anarana hoe Empira Tiorka na Torkia io fanjakana islamika sonita noforonin' ny Torka ogozy io tamin' ny fotoam-panjakan' i Osman I tao Anatôlia avaratra tamin' ny 1299.