Dionisiosy avy any Aleksandria
I Dionisiosy avy any Aleksandria na Dionisiosy Lehibe dia rain'ny Fiangonana, evekan'i Aleksandria sady olo-masina kristiana niaina tamin'ny taonjato faha-3.
Tsy dia misy zava-pantatra firy ny amin'i Dionisiosy, afa-tsy izay lazain'i Eosebiosy avy any Kaisarea. Mety tamin'ny fianfohan'ny taonjato faha-3 no nahaterahany tao Aleksandria. Zanaka jentilisa izy, mpianatr'i Origenesy sady mpandimby ny eveka Heraklasy tao Aleksandria (taona 247). Nenjehina i Dionisiosy tamin'ny fanapahan'ny emprerona Filipo Arabo (Marcus Iulius Philippus Augustus) (taona 248). Tamin'ny fanjakan'i Dekio (Gaius Messius Quintus Trajanus Decius) dia nialokaloka tany Libia izy. Nandritra ny fanenjehana ny Kristiana nampanaovin'ny emperora Valeriano (Publius Licinius Valerianus) dia nasesitany any Libia indray izy mandra-panafahan'i Galieno (Publius Licinius Egnatius Gallienus) azy (taona 262). Rehefa niverina izy dia nifanehatra tamin'ny fikomiana sy ny pesta. Nasaina tao amin'ny siniodan'i Antiokia izy (taona 264-265) nefa tsy afaka nanatrika izany noho ny fahanterany sy noho ny nahafatesany nandritra izany sinoda izany.
Ny loharano tena ahafantarana an'i Denisiosy dia ny asasoratr'i Eosebiosy avy any Kaisarea atao hoe Ἐκκλησιαστικὴ ἱστορία / Ekklêsiastikê historia ("Tantaran'ny fiangonana"), izay manao tonon-tsiahy zavatra maro nosoratan'i Dionisiosy. Ny asasoratr'i Dionisiosy dia mahakasika ny fitondram-piangonana (pastoraly). Nanohitra ny sabelianisma izy, nefa nahiahina hio triteista ka niezaka nanaporofo ny fanarahany ny fampianaram-pinoana marina (ortodoksia) tamin'ny nanoratany ny "Fanoherana sy Fiarovana ny finoana" izay nalefany tany amin'i Dionisio avy any Roma. Ny andalana ampahatsiahivin'i Eosebiosy dia momba ny novatianisma, ny sabelianisma, ny milenarisma ary ny epikorisma. I Dionisiosy dia nanda ny fanondroana ny mpanoratra ny Bokin'ny Apokalipsy ho ny Apostoly Joany, izay heverina koa ho nanoratra ny Evanjelin'i Joany sy ny Epistily telo amin'ny anaran'i Joany.