Borkina Fasô

I Borkina Fasô dia firenena ao Afrika Andrefana, manana velaran-tany mirefy 274 200 km², tsy manana morontsiraka. I Ouagadougou no renivohiny. Mamaritra azy avy ao avaratra sy andrefana i Maly, avy ao atsinanana i Nizera, ao atsimo i Benîno sy i Tôgô sy i Ganà ary i Kôtidivoara. Atao hoe Borkinabe ny vahoaka ao.

Sainam-pirenen' i Borkina Fasô

Mari-piandrianan' i Borkina Fasô

I Borkina Fasô ao Afrika

Sarin-tanin' i Borkina Fasô

Lembalemba, izay manana salan-kaambo mirefy 250 hatramin' ny 350 m, no manjaka amin' ny vohon-tanin' i Borkina Fasô. Milatsaka tampoka izany lembalemba izany any atsimo-andrefana izay ahitana hantsana sy ny riamben' i Banfora, midina izany any avaratra mankany amin' ny lohasahan' i Niger. Maro ny ony sy ny renirano manondraka an' i Borkina Fasô, ka isan' izany i Comoé, i Nazinon (na Volta Rouge), i Mouhoun (na Volta Noire) ary i Nakambé (na Volta Blanche). Matetika andalovan' ny haintany i Borkina Fasô ary maina ny rivotra.

Maro ireo vondrom-poko ao Borkina Fasô, ka ny lehibe indrindra dia ny Môsy izay 50 %n' ny vahoaka borkinabe; ao koa ny Peola, ny Toarega, ny ny Gormantse sy ny maro hafa izay vitsy anisa. Ny fivavahana silamo sy ny fivavahan-drazana afrikana animista no tena be mpanaraka ao, vitsy anisa ny Kristiana.

Zanatany frantsay taloha i Borkina Fasô izay nahazo ny fahaleovan-tenany tamin' ny taona 1960. Nantsoina hoe Haute-Volta i Borkina Fasô talohan' ny taona 1984. Ny fiteny frantsay no fiteny ôfisialiny.